ភ្នំពេញ៖ សេចក្តីព្រាងព្រះរាជក្រឹត្យស្តីពី "ការបង្កើត ការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ" ត្រូវបានអនុម័តក្នុងកិច្ចប្រជុំគណៈរដ្ឋមន្ត្រីដឹកនាំដោយនាយករដ្ឋមន្ត្រី សម្ដេចធិបតី ហ៊ុន ម៉ាណែត នៅព្រឹកថ្ងៃសុក្រ ទី២៧ ខែតុលា ឆ្នាំ២០២៣ នេះ។

ឧបនាយករដ្ឋមន្ត្រី រដ្ឋមន្ត្រីយុត្តិធម៌ លោក កើត រិទ្ធ បានថ្លែងថា ការបង្កើតអាជ្ញាធរជាតិនេះ គឺដើម្បីបំពេញបន្ថែមលើយន្តការដែលមានស្រាប់ និងអាចឆ្លើយតបនឹងតម្រូវការរបស់ប្រជាជននៅមូលដ្ឋាន ដែលចង់បាននូវដំណោះស្រាយវិវាទមួយ និងជាដំណោះស្រាយវិវាទដែលគូភាគីវិវាទទាំងអស់អាចទទួលយកបាន។

នាយករដ្ឋមន្ត្រី សម្ដេចធិបតី ហ៊ុន ម៉ាណែត សង្ឃឹមថាក្រោយច្បាប់ថ្មីនេះចេញនឹងអាចជួយកាត់បន្ថយការកកស្ទះសំណុំរឿងក្នុងប្រព័ន្ធតុលាការ។ សម្ដេចធិបតីថា ក្នុងអាណត្តិទី៧ ការដោះស្រាយ និងពង្រឹងប្រព័ន្ធយុត្តិធម៌គឺជាគោលដៅសំខាន់របស់រដ្ឋាភិបាល។

សម្ដេចថា៖ «ការបង្កើតជាអាជ្ញាធរជាតិដោះស្រាយវិវាទក្រៅប្រព័ន្ធតុលាការនេះយើងសង្ឃឹមថានឹងជួយរួមចំណែកក្នុងការផ្ដល់និងបង្កើតនៅសុខដុមរមនីយកម្មនៅការជួយ ដែលមិនជំនួសតុលាការនោះទេ។វាជាយន្តការសម្រាប់ជួយក្រៅប្រព័ន្ធ»។

សេចក្តីព្រាងព្រះរាជក្រឹត្យស្តីពី «ការបង្កើត ការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ» មានចំនួន ៦ជំពូក និង២២មាត្រា៕